Hondartzak

Leku pribilegiatua da Orio. Itsasoak, ibaiak eta mendiak bat egiten duten lekuan dago, eta urdina eta berdea da, guztiz naturala. Itsas-brisak garbi mantentzen ditu herriko bazterrak, eta mendiek ere arnas berezia ematen diote inguruari. Naturaltasun horren lekuko dira herriak dituen bi hondartzak: Antilla izena duen Orioko hondartza nagusia, eta Oribarzar hondartza txikia.

Hondartza nagusiaren inguruan berritze-lanak egin ziren 1997. urtean, eta harrezkero, beste itxura bat dute bai hondartzak eta bai inguruak ere.

Lasaitasuna da Orioko hondartzaren ezaugarri nabarmenena. Hondartza oso lasaia da Oriokoa. Egun jendetsuenetan ere (abuztuko igandeetan), beti dago lekua hondartzan. Eta aste barruan zer esanik ez, patxada ederrean egon zaitezke bertan.

Berritze-lanen ondorioz, lehen baino hobea da hondartza: 3500 m2-tik gorako azalera du; eta paseorako, berriz, bide luze eta paraje zoragarriak ditu. Hondartza gainaldean, gaztetxoentzako jolastokia eta belardi bikainak daude; eta, jakina, egarri-goseak asetzeko taberna-jatetxeak ere bai inguruan.

Hauexek dira hondartzan eta inguruan primeran pasatzeko eskura dituzunak:

• Komunak eta dutxak dohainik
• Haurrentzat jolastokia
• Belardi zabala
• Sorosleen babesa
• Taberna-jatetxeak
• Paseorako ibilbide zoragarriak
• Arrantzarako inguru aproposa